القاعده الاولي:
لو عربيتك كبيرة او قديمه استخدم مبدء اللي خايف علي عربيته يوسع و ملحوظه ابعد عن العربيات المخرشمه عشان بيسوقوا بنظرية ضربوا الاعور علي عينه قالهم ما هي خسرانه خسرانه
القاعده الثانيه:
اللي يدخل ببوز عربيته الاول صاحب اولوية المرور فاحرص علي ان تكون صاحب اول بوز و كمان ملحوظه اوعي تطبق حكاية البوز دي مع لوري ولا اتوبيس خوفا علي بوزك
القاعده الثالثه:
الاشارات تكشف نواياك للاعداء اياك تستخدمها
القاعده الرابعه:
لا تترك مسافه للامان بينك و بين العربيه اللي قدامك عشان ده خطر اولا :
هتدي فرصه لعربيه تانيه تيجي تملي الفراغ ده و برضه مش هيبقي فيه مسافه مع اللي قدامك
هتدي فرصه للعيال يعملو غرز قدامك
اللي وراك هيقعد يزمر لو مؤدب و لو سواق تاكسي هتسمع شوية اسامي حيوانات و لو سواق ميكرباص حيخبطبك من ورا و دول مفيش فيهم جد مؤدب
القاعده الخامسه:
اذا كنت مش واقف في الصف الاول من الاشاره اعمل حسابك تزمر بشكل هيستيري لان الناس اللي في الاول بيكونوا واقفين من بدري و احتمال كبير يكونوا ناموا
القاعده السادسه:
الشارع مكان مقرف سوق بسرعه اوي عشان تخلص من الهم ده و الناس اللي ماشيه بالراحه مرضي نفسيين بيستمتعوا بالعذاب و يستاهلو اللي يجرالهم
القاعده السابعه:
من حقوقك الدستوريه تركن قدام المحل اللي نازل تشتري منه و لو سبقك واحد ابن ستين في سبعين و ركن قدام الباب فمن حقك تقفل عليه و تركن صف تاني او تالت و ايه حتي لو الشارع اتقفل و الناس اتعطلت 10 دقايق هيه الدنيا طارت ولا كان وراهم الديوان يعني المهم انك تمارس حقك الدستوري
القاعده الثامنه:
احترس من العيال الروشين اللي بيلعبوا computer games و فاكرين انهم هيزيدوا life كل ما يسوقوا اسرع
و خلي بالك من سواقين الميكروباص بالذات و لو فكرت انهم غلطوا اوعي تعلق او تقول لا سمح الله
و بكده بقي يبقي احلي مرور في احلي بلد و هتفضل سايق عربيتك ليييييييل نهااااااااار
السبت 15 نوفمبر 2008, 10:25 pm
