سؤال مهم هل لسة في مصرين كدا ولا لا الموضوع مطروح للمناقشة

أيوه إحنا المصريين مختلفين عن الآخرين
المصري هو اللّي:
ممكن يعدي التلاتين ولسه عايش مع أمه وأبوه وماعندهومش مشكلة
بيفهم في الطب ويشخص المرض ويوصفلك الدوا وبيفهم في النقاشة والكهربا
وتصليح العربيات والطبيخ والسياسة والكورة وهو أآآبيض ياورد
ويحط الريموت كنترول في كيس بلاستيك كعادة فرعونية
ويقف يتكلم على الباب نص ساعة بعد إنتهاء الزيارة والسلام
ولمّا تفتح نملية المطبخ هتلاقي عنده عشرين برطمان بتاع مربى فاضي
بقالهم سنين ومازال مُصِر على جمع المزيد
وييجي بعد معاده بساعتين ويفتكر إن ده عادي
ولسه عنده إصرار إنه يتكلم بصوت عالي في التليفون لما تكون المكالمة
دولية عشان التاني يسمعه
وبيعتبر نفسه أفضل واحد في الشراء والفصال وبعد كده يكتشف إن الحاجة في المحل اللي جنبه أرخص من غير فصال
وبيحتفظ بأكياس محلات اللبس والأحذية وورق الهدايا تحت مرتبة السرير
لسنوات ومابيستخدمهاش
وعنده صينية مكسرات متقسمة لتلات او أربع أقسام لزوم المزاج وعمره ماإستخدمها
وبيشتري قبل الفطار في رمضان مواد إستهلاكية أصلا موجودة عنده في البيت لسه ماستخدمهاش
>>وبيكون عنده شواية لزوم الرحلات أقصى استخدام لها كان مرة واحدة في العيد
بيشيل طابع البريد من على الظرف لو الختم ماكانش عليه
بيفتكر إن أي حد بيشتغل في الخليج بيغرف فلوس من غير حساب ( دية اهم نقطة )
>>بيكون مشغول بقيمة التيبس أو البقشيش طول العشا ياترى ربع جنيه ولا نص جنيه
>>برده بيتخانق ساعة دفع الحساب بحرارة شديدة على إنه هو اللي لازم يدفع
بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا
والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم